கூட்டுறவு அலுவலர்களை கண்டித்து கரும்பு விவசாயிகள் சாலை மறியல்.

சேலம் மாவட்ட மேற்கு எல்லை பகுதியில் பூலாம்பட்டி, கூடக்கல், குப்பனூர், வடக்கத்திக்காடு, மோளப்பாறை, நெடுங்குளம் உள்ளிட்ட பல்வேறு பாசன பகுதிகளில் அதிக அளவில் விவசாயிகள் செங்கரும்பு சாகுபடி செய்துள்ளனர். இந்த நிலையில் தமிழக அரசின் பொங்கல் பரிசு தொகுப்பில் வழங்குவதற்காக சேலம், நாமக்கல், ஈரோடு, திருப்பூர், கரூர், தர்மபுரி உள்ளிட்ட பல்வேறு மாவட்டங்களை சேர்ந்த கூட்டுறவு துறை அலுவலர்கள் இப்பகுதியில் முகாமிட்டு கரும்புகளை மொத்த கொள்முதல் செய்து வருகின்றனர்.

இந்த நிலையில் சம்பந்தப்பட்ட கூட்டுறவு துறை அலுவலர்கள் ஒவ்வொரு கரும்பு வயலிலும் சுமார் 250 கட்டு கரும்புகள் மட்டுமே கொள்முதல் செய்வதாகவும், மீதம் கழித்து விடப்படும் கரும்புகளால் தங்களுக்கு பெரிய அளவில் நஷ்டம் ஏற்படுவதாகவும், பொங்கல் பரிசு தொகுப்பில் வழங்குவதற்காக வயலில் உள்ள கரும்புகள் அனைத்தையும் கொள்முதல் செய்திட வேண்டும் என்றும் விவசாயிகள் வலியுறுத்தினர். இந்த கோரிக்கையை வலியுறுத்தி நேற்று பூலாம்பட்டி கூட்டுறவு சங்கம் முன்பு திரண்ட காவிரி பாசன பகுதி கரும்பு விவசாயிகள் எடப்பாடி-மேட்டூர் பிரதான சாலையில் திடீர் சாலை மறியலில் ஈடுபட்டனர். 

இதையடுத்து அங்கு வந்த போலீசார் சம்பந்தப்பட்ட விவசாயிகளிடம் சமாதான பேச்சுவார்த்தை நடத்தி அவர்களை அங்கிருந்து அனுப்பி வைத்தனர். விவசாயிகளின் திடீர் சாலை மறியலால் அப்பகுதியில் பரபரப்பான சூழல் ஏற்பட்டது.